Psalm CXVI.

1. Ick hebb’ den Heer lief, want hy heeft verhoort,
Myn stemm’ ende bidden in myn swaer klaegen,
Ick sal hem bidden in myn quaede daeghen,
Om dat hy hem tot my neyght nae sijn woort.

2. Die stricken des doots hadden my omvaen,
Ick was belaeden met angsten der hellen,
Ick was in noot in suchten end in quellen,
Doch ick riep des Heeren naem also aen:

3. O Heer verlost myn siel’ wt desen noot,
End ick bevondt dat hy was seer weldaedigh,
Seer vriendelick end oock seere ghenaedigh,
Die wel behoudt d’eenvoudighe seer bloot.

4. Want als ick ter neder lagh onder voet,
Gheholpen heeft my onse Godt almachtigh,
Dies weest te vreden O myn siele klachtigh,
Nae dien dat de Heer u dees weldaet doet.

5. Ghy hebt Heer myn siel’ bevrijdt van den doot
Myn ooghen van traenen, myn voet voor vallen:
Dies wil ick wandelen myn daeghen alle,
Vromelick voor u O myn Godt seer groot.

6. Ick gheloove dies spreeck’ ick in’t gemeyn:
Doch wert myn siel’ seer jammerlick geplaeget.
Dies sprack ick met een ghemoet gaer vertzaeghet,
Alle menschen sijn lueghenaers met een.

7. Hoe sal ick doch Godt sijn weldaeden al
Verghelden? Ick sal den beker heylsaeme,
Nemen in der handt: end des Heeren naeme,
Met danckbaerheit ick verkondighen sal.

8. Ick wil myn beloften in’t openbaer,
Betaelen in Godts ghemeynte ghepresen.
Die doot der heylighen voor Godt sal wesen,
Een dingh dat kostelick is end dierbaer.

9. Heer’ ick ben u’ knecht, jae ick ben u’ knecht,
End’ een Sone van uwer dienstmaeght kleyne:
Myn banden hebt ghy ghebroken alleyne,
Dies wil ick u danckofferen oprecht.

10. Dat is, ick wil uwen naem maeken kondt,
Die heerlick is end seer hooghe verheven:
Ick wil den Heere myn belofe gheven,
Midden onder sijn volck tot deser stondt.

11. In den voorhoven des Heeren seer reyn
Wil ick van herten hem lofsanghen singhen,
Ick wil tot Ierusalem hem toebringhen
Synen prys: Loeft hem met my in’t ghemeyn.