Psalm CL.

1. Laett nu Godt ghepresen sijn,
In syn heylighdom seer fyn,
Gheloeft sy hy end gheacht,
Wt den hemel die vol kracht,
In heerlickheit hoogh’ verheven.
Loeft hem in sijn wercken reyn,
Die hy ghewrocht heeft alleyn,
Die van syn macht tuyghnis gheven.

2. Van herten lovet doch hem,
Oock met der basuynen stem,
End met der Psalteren toon,
Met trommels end harpen schoon.
Wilt sijnen lof end prys singhen:
Met der fluyten soet gheklangh,
End der orghelen ghesangh,
Laett sijn eere nu voortbringhen.

3. Syn goetheit sij openbaer,
Ghemaeckt, doer t’gheluydt seer klaer,
Der Cymbalen t’aller tydt,
Welcke seer breedt ende wydt,
Syns naems eer moeten bewysen:
Dies alles dat daer nu leeft,
Dat hem roert end aesem heeft,
Moet onsen Godt heerlick prysen.