De xiij. Psalm.

1. Hoe lange wilstu noch o Heer
My dus vergeten? tot wanneer
Wilstu van my sijnd’ af geweken
Dijn aenghesicht end’ gunst versteken?
Sal dit dus blyven ymmermeer?

2. Hoe lang’ sal noch mijn siel met smert
Raet end’ list soecken? end’ mijn hert
In commer end’ benoutheyt treuren?
Hoe langhe sal dit noch ghedeuren?
Dat mijns mijn vyant meester wert?

3. O Heer mijn Godt sie my doch aen
Wilt mijn ghebeden gade slaen,
Verlichte myne duyster ooghen
End’ wil doch nymmermeer ghedooghen,
Dats’ inden dootslaep t’ ondergaen.

4. Op dat mijn vyant vol van pracht
Niet seggh’: hy is in myner macht,
End’ dat die my hardt wederstryden
Haer nydich herte niet verblyden,
Dat sy my t’ onder hebben bracht.

5. Want Heer op dyne goetheyt staet
Mijn gantse hop’ end’ toeverlaet.
Mijn hert’ sal in dijn heyl ontspringhen,
Ick wil met vreugden mijn liedt singhen
End’ dancken Godt voor zijn weldaet.