De xv. Psalm.

1. Wie is hy die verkeeren sal
O Heer in dyne schoon ghebouwen,
Oft wie sal zijn van dyer ghetal
Die hare wooning’ eens voor all
Op dynen heyl’ghen berg vast houwen?

2. De mensch die wandelt recht end’ slecht
End’ sonder schalckheyt te versinnen
Doet eenen yeghelijcken recht,
End’ met den mont de waerheyt seght,
So hem zijn hert ghetuygt van binnen.

3. Dien syne tongh’ haer niet misgaet
In achterclap van synen naesten,
Die zijn ghesell’ niet brengt in schaed’,
Noch niet en soeckt met schand’ oft smaet
Sijn nagebueren te belasten.

4. Hy houdts’ in smaet end’ in oneer
Al die van Godt zijn afgheweken,
Maer eert den man die vreest den Heer:
Sijn eedt sal hy oock nemmermeer,
Al waert tot syner schade, breken

5. Die gheen ghelt uyt, op woecker gheeft
End’ die om gaven noch gheschencken
Der vromen recht niet veyl en heeft,
Voorwaer de mensch’ die aldus leeft
Hem sal gheen saeck ter werelt crencken.