De xxvj. Psalm.

1. Richt my, Heer, na mijn recht:
Want ick mijn wegen slecht
Bewandel met een vroom gemoet
Op Godt staet mijn vertrouwen,
Hy sal my so vast houwen
Dat my niet struyck’len sal de voet.

2. O Heer versoecke my
End’ ondertaste vry
Off ick met valsheyt ommegae
Bekoor mijn hert’ end’ nieren
In allerley manieren,
End’ goed’ acht op mijn wandel slae.

3. Want dijn gunst end’ weldaet
My eewelijcken staet
Voor d’ ooghen claer end’ int ghesicht.
Ick hebbe mynen handel,
End’ allen mynen wandel
Nae dyne waerheyt steed’s ghericht.

4. Ick hebbe noyt gheleeft
Met t’ volck dat hem begheeft
Tot loghentael end’ valschen schijn.
Ick wil met dien niet treden
Die onder hare leden
Bedeckt end’ dobbelhertich zijn.

5. Ick schroom’ end’ hebb’ een haet
Van al t’ gheselschap quaet
Dat sick tot boosheyt heeft ghewendt:
Dies will’ ick niet verkeeren
Met lie’en die Godt niet eeren
End’ dien zijn naem is onbekent.

6. Ick wasch’ myn’ handen reyn
So ick’t van herten meyn’
In onschult suyver ende claer,
Dies sal ick comen treden
Met offers end’ ghebeden
Voor dynen heylighsten autaer.

7. Op dat mijn hert’ end’ mont
Dijn lofsang make kondt
Met heller stemmen end’ gheklanck,
End’ dyne wonderwercken
Die sick vry laten mercken
Vertelle dy tot lof end’ danck.

8. Ick muur met herten kuys
De stede van dijn huys
Daer sick dijn goetheyt openbaert:
Ick houd’ in grooter weerden
Die woonstadt hier op eerden
Daer sick dijn heerlijckheyt verclaert.

9. Laet mijn siel inden loop
Met der sondaren hoop
O Heer niet werden opgheraept.
Noch mijn onschuldig leven,
Met’t volck die haer begheven
Tot bloet vergieten, zijn betraept.

10. Want in haer wreede handt
Steeckt boosheydt allerhandt
Die hun de gheest altijts bedenckt.
De vuyst wert hun bestreken
End’ d’ ooghen gants besteken
Met giften diemen steed’s hun schenckt.

11. Maer ick sal my altoos
Afkeeren van het boos’
End’ steed’s met vroomheyt ommegaen
O Heer, mits dijn ghenaden
Verlost my vanden quaden.
Ontferm dy mijns: end’ neemt my aen.

12. Die wyl’ mijn voeten staen
Nu op de rechte baen
Wel vast end’ vry van allen noot.
So wil ick God den Heere
Oock gheven prijs end’ eere
Voor menichten van volcken groot.