De xxix. Psalm.

1. Gheeft ghy vorsten groot geacht,
Gheeft God’ eer, prijs ende macht
Biedt eer ende loff te saem
Godes aller hoogsten naem,
Doet den voetval voor den Heere:
Bidt hem aen, End’ doet hem eere
Inde heerlijcke woonsteden
Syner weerden heylicheden.

2. s’ Heeren stemm’ met groot ghebaer
Druysschet over t’ water claer
Over wolcken inde lucht
Dondert Gods macht met gherucht.
s’ Heeren stemm’ end’ donder crachtich
Thoont wel dat hy is almachtich.
s’ Heeren stemm’ vol grooter weerden
Tuygt zijn heerlijckheyt op eerden.

3. s’ Heeren stemme met ghewelt
Cederboomen nedervelt:
d’ Hoogste Cedren worpt in ’t sant
Die op Liban staen gheplant.
Den berg Liban doet hy springhen
Als een jonck calf niet om dwinghen.
Ende den berg Sirjan beven
Als een Eenhorn hooch verheven.

4. s’ Heeren stemme splijt van een
Vlammen viers end’ doet se scheen.
Hy doet beven t’ wilde wout
End’ maeckt Cades seer benouwt.
Hinden wilt doet hy mis baren.
Wt ancxt die haer seer vervaren
Hy doet bosschen end’ plantsoene
Van ancxt schieten haer loof groene.

5. Maer ’tvolck Gods groot ende cleyn
Gaet in synen tempel reyn
Daer elck een die syn’ naem vreest
Looft end’ danckt hem uyt den gheest.
God regeert end’ can verhoeden
Wolcken ende watervloeden
God is Coninck seer grootdadich
Ende zijn rijck blijft ghestadich.

6. God sal gheven sterckt’ end’ cracht
Synen volck’ dwelck op hem wacht:
De Heer sal met vrede goet
Sijn volck seg’nen in voorspoet.