De Liiij. Psalm.

1. Verloss’ my Heer door dynen Naem
Mits dijn ghenad’ wil mijnr’ ontfermen,
Wil my doch in mijn recht beschermen
Door dyne cracht groot end’ heylsaem.
Hoor mijn ghebet end’ droeve clacht,
End’ neyge my dijn gunstigh’ ooren
Om myne woorden aen te hooren
End’ op de selve te slaen acht.

2. Want vremde teghen my opstaen:
Een grousaem volck stout end’ hoomoedich
Staen my na t’ leven seer verwoedich,
End’ willen d’ oogh op Godt niet slaen.
Nochtans is Godt mijn helper groot
De Heer is aen der ghener syde
Die my staen by, in desen stryde,
End’ m’onderstutten inden noot.

3. Hy sal mijn vyant ghelden we’er
Het quaet dat hy m’heeft toebereydet
Heer nae dijn trouwe lang’ verbeydet
Verniels’ end’ slaef’ al t’ saem ter ne’er.
Soo sal ick uyt ghewill’ghen moet
Dy offers aenghenaem voortdraghen,
End’ dynes naemens loff ghewaghen
Die lieflijck is end’ machtich goet.

4. Want du hebst my uyt all’ onrust
End’ ancxt verlost self nae mijn wensschen:
Mijn ooghe siet aen dese menschen
Die my vervolgden, mynen lust.