De Lxx. Psalm.

1. Och God wil dy doch haesten seer,
Om my te helpen uyt den laste,
Kom aen, kom stracx met grooter haste
Tot myner hulp’ mijn God mijn Heer,
Dat all’ die my nae t’ leven jaghen,
Tot schande werden end’ tot smaet,
End’ die my gunnen leet end’ quaet,
Werden met schand’ te ruggh’ gheslaghen.

2. All’ die my segghen smaet end’ hoon,
End’ schamp’rich my ha, ha, na schreyen,
Flocx moeten self van hier verscheyen,
Met schand’, end’ spott tot haren loon:
Maer wie dy soeckt voor alle dinghen,
Moet zijn verheugt in dy o Heer,
End’ wie dijn heyl wel houd’t in eer,
Moet dynen lof ghestadigh singhen.

3. Ick ben bedruckt end’ byster erm,
Kom dan o Heer my stracx ontsetten,
In mynen noot: wilt niet verletten,
Du bist mijn hulp’ mijn schutt end’ scherm.