De Lxxxiij. Psalm.

1. Heer houde dy niet langher stil,
End’ swygh doch niet in dit gheschil:
End’ en wil onser niet vergheten,
Dewijl dijn vyanden niet vieren:
Maer rasen, brullen, ende tieren,
End’ steken t’ hooft op, seer vermeten.

2. Sy hebben met een boos’ opsaet,
Besloten haren schalcken raet:
Om dijn volck heym’lijck t’ onderdrucken:
End’ hebben t’ samen al ghesworen,
t’ Verderf van dijn volck uytvercoren,
Die onder dijn beschermingh’ bucken.

3. Comt aen, laet ons dit volck terstont,
Gheheel verderven uyt den grondt:
Dat het gheen volck meer ghenoemt werde,
End’ datmen haers naems soo verghete,
Dat niemant schier voortaen en wete,
Off Israel d’ eerd’ oydt beterdde.

4. Sy zijn by een te raey ghegaen,
End’ hebben een verbondt gheslaen,
Edom met den Ismaeliten.
t’ Volck Moab end’ Agars gheslachten:
Hebben by een ghevoeght haer machten
Met Gebal end’ den Ammoniten.

5. Het rouw’ Amalekiter landt,
End’ Tyrus ligghend’ aen den strandt:
Sijn t’ samen met den Palestinen:
Assur heeft hem daer toegheslaghen,
End’ met Lots kind’ren willen waghen,
Om hun als haren erm te dienen.

6. O Heer wil met hun ommegaen,
Ghelijck du voortijts hebst ghedaen:
Met Madian die met schand’ weken,
Doe Jabin end’ Sisra verslaghen,
In Endor als een mest hoop laghen
Niet wijt van Cisons waterbeken.

7. Betaelse met der selver soudt,
Als Oreb end’ als Zeeb stoudt:
Oft Zeba end’ Salmuna mede,
All’ haere vorsten. Die daer seyden,
Laet ons ons’ palen wijt verbreyden,
End’ inne nemen Gods woonstede.

8. Draeys’ om end’ om met lijf end’ siel,
Mijn God ghelijckmen draeyt een wiel,
Oft als een caff drijft voor de winden:
Ghelijckmen siet een vlamme blaken
Int bosch, end’ t’ hout tot kolen maken,
End’ boomen op t’ ghebergt’ verslinden.

9. Niet anders Heer, daerinne slae:
End’ volgse met onweder nae.
Dijn storm verdrijfs’ aen allen hoecken.
Laet schand’ haer t’ aenghesicht bedecken
Op dat des’ opgheblasen ghecken
Dijn naem haers ondancks leeren soecken.

10. End’ laets’ in schanden end’ verdriet,
Verslaghen comen gantz te niet.
Op dat sy weten sonder dwalen,
Dat dijn naem is God eewich Heere:
Dien alleen hoort de hoogste eere
Wijt over alle swerelts palen.