De Cxvj. Psalm.

1. Ick heb God lief, want hy heeft aengehoort,
Mijn droef gheschrey. End’ heeft tot mijn gebeden
Sijn oor geneygt, hy ontfanckt myne reden:
Dies wil ick hem aenroepen rechte voort.

2. Banden des doots hadden my vast belegt,
Ick was van ancxt als in het graf gheschoten:
End’ t’ hert’ was my van bangicheyt ghesloten,
Als ick tot God hebb’ op dees’ wijs ghesegt:

3. Ach lieve God, help my doch vanden doot:
Ic vond’ hem stracx seer oprecht end’ goetdadigh:
Voorwaer ons’ Heer is goedigh end’ ghenadigh:
End’ hy bewaert d’ ootmoedigh’ inden noot.

4. Ick was benouwt end’ schier te niet gegaen,
Maer hy heeft my verlost uyt all’ onlusten.
Dies keer we’erom mijn siel tot dyner rusten,
Want God heeft dy seer groote deugt ghedaen.

5. Du hebst mijn siel Heer vanden doot bevrijdt,
Van schreyen d’ oogh’, de voeten van het sneven.
Dies wil ick vry onder de ghen’ die leven,
Voor t’ aenschijn Gods recht wand’len alle tijdt.

6. Ick heb’t ghelooft, dies sal ick spreken vry:
Ick was bynae onder den last ghebleven,
So dat ick sprack uyt haesticheyt gedreven:
Daer’n is gheen mensch die sonder leughen sy.

7. Maer wat sal ick vergelden God den Heer,
Voor alle sijn weldaden hoog’ van weerden?
Den beker schoon sijns heyls sal ick anveerden,
Roepend’ hem aen, met danck, loff, prijs end’ eer.

8. Ick sal voldoen al mijn gheloften saen,
Voor t’ aengesicht van t’ gansche volck der Heeren.
Voorwaer God houdt in grooter weerd’ end’ eeren.
Der genen doot die naer de vroomheyt staen.

9. Genad’ o Heer, want ic ben dyne knecht,
Dijn knaep, end’ soon van dyner maecht ootmoedigh:
Du hebst ghelost mijn banden o Heer goedigh:
Dies ben ick doch dijn eyghen slaef’ met recht.

10. Dies wil ick dy opofferen met vreugt,
Danck ende prijs, end’ roepen aen dijn name:
End recht voldoen mijn g’loften al te same,
Voor al dijn volck van herten seer verheugt.

11. Voor inden vloer des heeren tempels reyn,
Binnen der stadt Jerusalem ghepresen,
Sal dyne naem seer hoogh’ gheroemet wesen
Looft God den Heer ghy alle groot end’ cleyn.