Den xiij. Psalm.

1. Hoe lange salt du noch O Heer,
My gantz vergeten? tot wanneer
Salt du, van my sijnd afgeweken,
Dijn vriendlijck aengesicht versteken?
Sal dit dan dueren immermeer?

2. Hoe lang sal mijne siel met smert,
Gaen soecken raet? end mijn bang hert
Benautheyt end verdriet besueren?
Hoe lange sal ick sien met trueren,
Dat mijns mijn vyandt meester wert?

3. O Heer mijn God, sie my eens aen:
Wil mijn gebeden gade slaen:
Verlichte mijne duyster oogen:
End wil doch nemmermeer gedoogen,
Dats’ inden dootslaep t’ondergaen.

4. Dat mijnen vyant vol van pracht,
Niet segg’, hy is in mijner macht:
End dat die my hardt wederstrijden,
Haer vinnich herte niet verblijden,
So ick ter neder waer gebracht.

5. Doch, Heer, op dijne gunste staet
Mijn hoip, end gantze toeverlaet.
Mijn hert sal in dijn heyl ontspringen,
Ick wil met vreugden dijn liedt singen,
End dancken God voir sijn weldaet.