Den xxvj. Psalm.

1. O Heere, doe my recht,
Want ick mijn wegen slecht,
Bewandel’ met een vroim gemoet,
Op God staet mijn vertrouwen:
Hy sal my so vast houwen,
Dat my niet struycklen sal den voet.

2. Heer, ondergronde my,
End ondertaste vry,
Of ick met valscheyt ommegae.
Bekoir, Heer, end betrachte,
Mijn hert end mijn gedachte,
End mijne nieren gade slae.

3. Want dijn gunst end genaed,
My vast voir oogen staet,
End blijft my altijts int gesicht.
Ick hebbe mijnen handel,
End allen mijnen wandel,
Nae dijne waerheyt scherp gericht.

4. Ick hebbe noyt geleeft
Met tvolck dat hem begeeft,
Tot leugentael end valschen schijn.
End hebbe noyt getreden
Met lien, die in haer reden
Bedeckt end dobbelhertig sijn.

5. Ia ick heb eenen haet
Van al tgeselschap quaet,
Dat slechts nae boose rancken tracht:
End wil gantz niet verkeeren,
Met tvolck dat Gods des Heeren
Geboden schendelijck veracht.

6. Ick wasch mijn handen reyn
Heer, inde schoon fonteyn,
Van onschult suyver ende claer:
End wil so comen treden,
Met offers end gebeden,
Om dijnen heyligen autaer.

7. Op dat ick mach, verblijt
Doen luyden verr’ end wijt,
Dijn deugt, met stem van lof end danck:
End al dijn wonderwercken,
Die alle man mach mercken,
Vertellen in mijn lofgesanck.

8. Ick heb van herten lief,
Dijns heylgen huys gerief:
Daer du dy aen ons openbaerst.
End houd’ van grooter weirden
Dijn woonstat hier op eirden,
Daer du dijn heerlickheyt verklaerst.

9. Heer, laet doch inden loop,
Der sondaers, metten hoop,
Mijn siel niet werden opgeraept:
Gedoog niet dat mijn leven,
Met lien die haer begeven,
Tot bloetvergieten, werd betraept.

10. Der welcker schalcke handt,
Na quade perten brant,
Die hun het hert altijt bedenckt.
End haer vuyst wort bestreken,
End d’oogen uytgesteken,
Met giften, die elck een hun schenckt.

11. Maer ick wil my altoos
Afhouden van het boos,
End steets met vroimheyt ommegaen.
Verloss my vanden quade,
O Heer, doe my genade,
End neem my in dijn schutting aen.

12. Dewijl mijn voeten staen
Wel vast op d’effen baen,
Versekert end uyt allen noot,
So wil ick God den Heere,
Oock bieden lof end eere,
In svolcks vergaderingen groot.