Den Cj. Psalm.

1. Ick ben van sins te stellen schoon by dichte,
Een heylig liedt van goetheyt end gerichte,
End wil met vreugt tot dijns naems lof end eer,
Psalmsingen, Heer.

2. Ick wil met vlijt den rechten wech na trachten
End met gedult nae dijne comste wachten,
End midler tijt my dragen binnens huys
Met herten kuys.

3. Gheen boose saeck sal my voir oogen comen:
Ick hate doch de wercken der onvromen:
Dies sal gheen stuck van al haer stout bestaen
My kleven aen.

4. Wie van gemoet schalck is end vol ontrouwen,
Moet van my wech, end mach sie hier niet houwen
Gemerckt ick my by geenen valschen man,
Vervoegen kan.

5. Die achterrug quaet van hun naesten spreken,
Wil ick van my met ongenaed’ versteken.
Wie trotsich is end opgeblasen siet,
Dien lijd’ ick niet.

6. Maer wil de geen aensien met goeden oogen,
Die haer oprecht end ongeveynst betoogen,
Op dat tvroim volck sijn woning by my hou,
End dien my trou.

7. Die sick met list end valsch bedroch geneiren
Sal ick met toirn’ uyt mijnen huyse weiren:
Niet een van die met leugens ommegaen
Sal voir my staen.

8. Ick wil heel vroeg al die sick godloos dragen
Te niete doen, end uyt den lande jagen:
Op dat Gods stadt ontledigt ende vry
Van onrecht sy.