Den Cxxi. Psalm.

1. Of ick op bergen slae mijn oog,
End inde weirelt soeck
Ontset aen elcken hoeck,
So is doch God, die d’Hemels hoog,
End d’aertrijck heeft geschapen,
Alleen mijn hulp end wapen.

2. Hy sal dy stieren dijnen voet,
End hoeden vanden val:
Want hy niet sluymen sal.
Voirwaer die Israel behoedt,
Sal sijn volck niet versuymen
Met slapen noch met sluymen.

3. De Heer sal dijn behoeder sijn,
Dijn schaedwe, schut end scherm,
Aen dijnen rechtren erm.
Op dat de heete Sonneschijn
By daeg dy niet verbluyster,
Noch maen verkou by duyster.

4. God is die dijn siel van tbegin
Tot deynde toe behoedt
Van allen teghenspoet.
End waer du gaetst, tsy uyt oft in,
Sal dy altijts bewaren,
Van nu tot eewge jaeren.